ნახევარი მართლაც თავად რუსებმა ჩამოყარეს

ირაკლი ალადაშვილი

ჩამოგდებული რუსული ბომბდამშენის ნაწილები ჩემთან ინახება, რუსეთის გენშტაბი კი დღემდე უარყოფს მის ჩამოგდებას!

ინგლისურენოვან რუსულ სპეციალიზებულ საიარაღო ჟურნალ Moscow dejence brief-ში გამოქვეყნდა სკანდალური სტატია, რომელიც მაშინვე აიტაცეს მსოფლიოს წამყვანმა საინფორმაციო საშუალებებმა.

კერძოდ, ჟურნალი ამტკიცებს, რომ აგვისტოს ომის დროს ჩამოაგდეს არა ოთხი რუსული თვითმფრინავი (როგორც ეს რუსეთის თავდაცვის სამინისტროს ოფიციალური მონაცემებითაა ცნობილი), არამედ ექვსი და ამ ექვსიდან სამი თავად რუსმა მეზენიტეებმა შეცდომით ”მეგობრული ცეცხლით” ჩამოყარეს.

8 აგვისტოს საბრძოლო მოქმედებების რაიონში ჩამოგდებული Су-25 ტიპის მოიერიშე არა ქართული, არამედ რუსული იყო, იგი, სავარაუდოდ, თავად რუსმა მეზენიტეებმა დააზიანეს, ხოლო კატაპულტირებულ და პარაშუტით დაშვებულ პილოტს ცეცხლი ოსმა სეპარატისტებმა გაუხსნეს…

ამის შემოწმება გორიდან, ჯერ კიდევ 8 აგვისტოს საღამოს შევძელით და თანაც მარტივი და უტყუარი ხერხით – ქართული Су-25-ების პილოტებს გადავურეკე და დავრწმუნდი, რომ ყველა საღ-სალამათი იყო!

სხვათა შორის, ცნობილია იმ რუსი სერჟანტის ზუსტი ვინაობა, რომელმაც საკუთარი მოიერიშე გადასატანი საზენიტო-სარაკეტო კომპლექს ”იგლათი” ჩამოაგდო. იგი თანამებრძოლებმა ჯერ კარგად სცემეს, შემდეგ კი რუსეთის პრეზიდენტმა დააჯილდოვა ”მტრის თვითმფრინავის” ჩამოგდებისთვის, ისევე როგორც დააჯილდოვა რუსული სარაკეტო კატარღა ”მირაჟის” კაპიტანი ”საზღვაო ბრძოლაში ქართული კატარღების ჩაძირვისთვის”. არადა, როგორც არანაირი საზღვაო ბრძოლა არ გამართულა (ქართული კატარღები რუსმა მედესანტე-დივერსანტებმა ფოთის სამხედრო პორტში ააფეთქეს), ისე, საბედნიეროდ, არც ერთი ქართული Су-25 არ ჩამოუგდიათ.

გარდა რუსი სერჟანტისა, ცნობილია იმ რუსი მედესანტე-პოლკოვნიკის გვარიც, რომლის დანაყოფმა გორისკენ მარშის დროს ასევე ჩამოაგდო Су-25 ტიპის მოიერიშე, რომელიც ასევე რუსული იყო.

არ გეგონოთ, რომ რუსი მეზენიტეები მთლად სულელები არიან და ყველაფერს ესვრიან, რაც დაფრინავს. ეტყობა, აქ ორმაგი შეცდომა დაუშვეს – Су-25-ების რუსი პილოტები შეცდომით ბომბავდნენ რუსულ ჯავშანკოლონებს, რადგან ქართული ეგონათ, შესაბამისად, მეზენიტეებიც ესროდნენ მათ თავზე შეტევაზე გადმოსულ თვითმფრინავებს…

ყოველივე ეს, რა თქმა უნდა, მიუთითებს რუსეთის სახმელეთო დანაყოფებისა და ავიაციის შეუთანხმებელ საბრძოლო მოქმედებებზე.

თუმცა რუსი აგრესორების ეს სერიოზული პრობლემა ბოლომდე საჩვენოდ ვერ გამოვიყენეთ…

ახლა რაც შეეხება ჩამოგდებულ რუსულ თვითმფრინავებს:

ამის შესახებ დღემდე კამათობენ. ქართული მხარე თავიდან ამტკიცებდა, რომ 21 რუსული საფრენი აპარატი ჩამოაგდო, შემდეგ ლაპარაკობდნენ 19-ზე, ბოლოს, მგონი, 15-მდე ჩამოვიდნენ თავდაცვის სამინისტროში.

რუსეთის გენშტაბმა ომის დამთავრებისთანავე განაცხადა, რომ დაკარგა მხოლოდ და მხოლოდ ოთხი თვითმფრინავი – სამი Су-25 ტიპის მოიერიშე და ერთი შორი მოქმედების ბომბდამშენი Ту-22М3.

რეალურად ჩამოგდებული შეიძლება იყოს ექვსი რუსული საბრძოლო თვითმფრინავი – სამი Су-25 მოიერიშე, ორი საფრონტო ბომბდამშენი Су-24М და ერთი Ту-22М3. ამასთანავე, 16 აგვისტოს (როდესაც საბრძოლო მოქმედებები შეწყვეტილი იყო), ჯავასთან, საველე აეროდრომზე რუსი მესაზღვრეების Ми-8МТ ტიპის შვეულმფრენი მეორე შვეულმფრენს თავზე დააჯდა და ორივე აფეთქდა. იმავე დღეებში ცხინვალში ჩამოაგდეს 2-3 უპილოტო სადაზვერვო აპარატი, რომლებიც ნამდვილად არ იყო ქართული. გარდა ამისა, სამმა დაზიანებულმა რუსულმა Су-25-მა მოახერხა აეროდრომებზე დაბრუნება.

რუსული ჟურნალის სკანდალურ სტატიას მაშინვე გამოეხმაურა რუსეთის გენშტაბის უფროსის მოადგილე ანატოლი ნოგოვიცინი. მან კატეგორიულად უარყო რუსი მეზენიტეების მიერ რუსულივე თვითმფრინავების ჩამოგდება და კვლავაც განაცხადა, რომ აგვისტოს ომში რუსეთმა მხოლოდ ოთხი თვითმფრინავი დაკარგა.

ეს სწორედ ის შემთხვევაა, როდესაც შეიძლება ხმამაღლა თქვა, – ფიცი მწამს, ბოლო მაკვირვებსო! მაშინ რა ვუყოთ იმ რუსულ Су-24М ტიპის ბომბდამშენის ნაწილებს, რომლებსაც დღესაც ვინახავთ?

სტატიის ავტორმა ეს ნაწილები სოფელ ძევერაში, რუსული ბომბდამშენის ჩამოგდების ადგილზე აკრიფა, რაც უკვე ნათლად მიუთითებს, რომ რუსი გენერალი, ისევე, როგორც მთელი რუსული გენშტაბი, ტყუის!

გენერალი ნოგოვიცინი მაშინაც ცრუობს, როდესაც ამტკიცებს, რუსული თვითმფრინავები რუს მეზენიტეებს არ ჩამოუყრიათო.

ეს არის ძალიან იშვიათი შემთხვევა, როდესაც რუსული გენშტაბი თანახმაა, ქართული საჰაერო თავდაცვის ძლიერებაზე ისაუბროს, ვიდრე აღიაროს, რომ რუსი პილოტები რუსმავე მეზენიტეებმა ჩამოყარეს.

როგორც აღვნიშნეთ, ადვილი შესაძლებელია, სამიდან ორი Су-25 თავად რუსებმა ჩამოაგდეს ისევე, როგორც მათვე დაღუპეს 2-3 უპილოტო სადაზვერვო თვითმფრინავი და ორი შვეულმფრენი.

ცუდ შედეგს მოგვიტანს თავის მოტყუება – რუსი აგრესორების თითქოს 21 ან თუნდაც 15 საფრენი აპარატი ჩამოვაგდეთო.

ამხელა ციფრების გაჩენა კი იმან გამოიწვია, რომ ჩვენმა სამხედრო-საჰაერო ძალებმა (რომელშიც შედის საჰაერო თავდაცვაც) და სახმელეთო ჯარების ჰაერსაწინააღმდეგო თავდაცვამ თავ-თავიანთი სიები წარადგინეს დასაჯილდოებლად. საერთო ჯამში, მათ თუ ენდობით, გამოდიოდა, რომ რუსებს თითქმის მთელი საავიაციო პოლკი გავუნადგურეთ, რაც რა თქმა უნდა, შორს არის სინამდვილისგან.

ჩვენს მეზენიტეებს, ჩანს, რუსული მოიერიშის ახლოს აფეთქებული ყველა სითბური რაკეტა და საზენიტო ჭურვი ჩამოგდებული თვითმფრინავი ეგონათ. არადა, ჯერ კიდევ ავღანეთის ომის დროს მიღებული გამოცდილებიდან თბილისის საავიაციო ქარხანამ მნიშვნელოვნად გააძლიერა Су-25 ტიპის მოიერიშეების საბრძოლო სიცოცხლისუნარიანობა…