გმირთა ვარამი

კობა ლიკლიკაძე

11 იანვარს საქართველომ სენატორ ჯონ მაკკეინის სახით ახალი საპატიო, ეროვნული გმირი შეიძინა. იმავე დღეს საქართველოს საზოგადოებამ დაიბრუნა გადამდგარი გენერალი კობა კობალაძე, ვახტანგ გორგასლის ორდენის ერთადერთი სრული კავალერი. სამხედრო პირი, რომელიც 1990-ი წლიდან ყველა სამხედრო ოპერაციაში მონაწილებდა, მათ შორის 2008 წლის აგვისტოს რუსეთ-საქართველოს ომში, როგორც მოხალისე – თბილისის საქალაქო სასამართლომ უდანაშაულო სცნო სამხედრო ამბოხების ბრალდების ნაწილში და პირდაპირ დარბაზიდან გაათავისუფლა.

ამასთან, სასამართლომ გაიზიარა სახელმწიფო ბრალდების პოზიცია და ხანგრძლივი პატიმრობა მიუსაჯა სატანკო და “რეინჯერთა” ბატლიონი მეთაურებს, ლევან ამირიძესა და მამუკა გორგიაშვილს. ოფიცრებს, რომელთა ქვედანაყოფები, თავად სამხედრო ხელმძღვანელობის შეფასებით, ბოლომდე და თავდადებით ასრულებდნენ საბრძოლო მოვალეობას რუსეთ-საქართველოს აგვისტოს დროს, -დაუმტკიცდათ “სახელმიწფო ხელისუფლების დამხობის მიზნით ამბოხის მომზადება.” ლევან ამირიძე 28, ხოლო მამუკა გორგიაშვილი – 19 წელს დაჰყოფენ საპატიმროში, -ასეთი თემიდას ვერდიქტი.

მაგრამ ამით სისხლის სამართლის საქმე სახელწოდებით “მუხროვანის ამბოხება”, – რა თქმა უნდა არ დახურულა. მსჯავრდებულები საკასაციო წესით გაასაჩივრებენ განაჩენს ზემდგომ სასამართლო ინსტანციებში. ეს არის და – ეს. პოლიტიკითა და სოციალური პრობლემით გადაღლილ საზოგადოებას სიღრმეებში წვდომა და წარსულის გაანალიზებისათვის აღარ სცალია.